Atxagaren lana BBC irratian larunbatean

BBC irratiak duen kultur programa ezagunenetarikoa da Saturday Review. Tom Sutcliffek gidatuta, astean zehar izan diren kultur albiste nagusienen berri ematen dute, ikuspegi kritiko eta zorrotzarekin.

Aste honetan jorratuko dituzten gaien artean, besteak beste, Seven Houses in France eleberria izango dute hizpide eta Atxagari egindako elkarrizketa baten pasarteak ere emango dituzte.

Zazpi etxe Frantzian eleberriaren ingelesezko itzulpena joan zen ostegunean argitaratu zen eta dagoeneko hasi da lehenengo erreferentziak eta iruzkinak jasotzen egunkarietan (adibidez: Financial Times eta Daily Mail).

Azken edizio honekin ingelesezko seigarren liburua du Atxagak. Seven Houses in France eleberriarekin batera, lehenago ere argitaratuta zeuden beste hauek: Obabakoak, The Lone Man, The Lone Woman, Two Brothers eta The Accordionist's son.

Programa zuzenean jarraitu ahal izango da BBCren webgunean bertan, datorren larunbat arratsaldean, 19.15etatik aurrera, eta ondoren Podcasta jaisteko aukera ere izango da.