« Back
Atxaga hizlari Oxforden, euskal gaien inguruko jardunaldietan
2012-06-19 ¦ Jardunaldiak
XV Forum for Iberian Studies jardunaldien harira, euskara eta euskal gaiek leku berezia hartuko dute bihar hasi eta ekainak 22an bitartean Oxfordeko unibertsitate entzutetsuan. Guztira, hemezortzi euskal hizlari izango dira bertan, haietako hamaseik gainera euskal gaiak izango dituzte hizpide eta sei euskaraz arituko dira. Euren artean izango da Bernardo Atxaga idazlea.
Aurreko edizioren batean euskararen inguruko zerbait antolatu bada ere, euskal munduak inoiz ez du izan horrelako oihartzunik Oxfordeko Unibertsitate ospetsuan.
Etxepare Euskal Institutuaren irakurle Xabier Paya izan da ekimenaren sustatzaileetako bat. Mari Jose Olaziregi Institutuko euskararen sustapen eta hedakuntzarako zuzendaria ere han izango da bere ikerketaren berri ematen.
Katalana, galegoa, gaztelania, ingelesa eta portugesa ere entzungo dira euskararekin batera Oxforden. Jardunaldien hasierako hitzaldian esaterako, Bernardo Atxagak (Euskal Herria), Isabel Capeloa Gilek (Portugal), Josep Anton Fernándezek (Catalunya), Jose Manuel Sandek (Galiza) eta Rob Stonek (UK) hartuko dute hitza.
Inmigrazio korronteek eta hedabide zein teknologietarako sarbideek herrien izaera ulertzeko eta azaltzeko moduan eragindako aldaketak aztertuko dituzte. Beraz, hizkuntza, identitatea eta kultura bezalako gaiak izango dituzte hizpide hizlariek literatura eta zinema bezalako esparruetan.
Jardunaldien inguruko xehetasun gehiago (ordutegiak, informazio praktikoa, eta abar) euren webgunean bertan, National Identitites at the Intersection.